Trots

Streektaol is een regelmatig terugkerende column van Ans Klok van Taolschulte Westerveld.

Da'k trots binne op mien streektaol, ik prote 't, ik deinke der in en misschien droom ik mien dromen ook wel in 't Drents, weej nou wel.

Maor dat er nou toch nog wel een doemdikke trots bij opekomen is zuj begriepen a'k oe vertelle dat het Nedersaksisch sinds 10 oktober 2018, naost het Nederlaands en het Fries, as volwaardige taol erkend is. Der is deur de mitwaarkers van het Huus van de Taol in Beilen en aandern hiel wat meuite veur edaone, maor 't is klaor.

En wat doet wij dan zoal deur het jaor hen waordeur dizze 'titel' oens toekomp ?

De missie is kört: het stimuleren van het Drents deur een hiele köppel activiteiten te doen. Want, wij viendt de streektaol slim weerdevol uut cultureel én taolkundig oogpunt. Het is een gemienschappelijk bezit waor wij mit mekaer zunig op moet wezen wilt en ook bint. Dat stimuleren van het Drents doew wel op eigentiedse meniere, wij gaot mit oenze tied mit!

Wij hebt:

– goed onderholden websites

– twei prachtige tiedschriften: Zinnig en Roet

– wij drei schriefgroepen

– een website veur onderwiesmaterialen: www.wiesneus.nl

– 240 kaarkdiensten en meer as 200 psalms en gezangen in de streektaol

En wij:

– holdt al vijftien jaor het Drents Letterkundig Documentatiecentrum bij

– leest ieder jaor an 23.000 kiender veur

– deden in tien jaor 111.085 boeken de deure uut

– leuten toneel en muzikale projecten een plekke kriegen

Dan:

– is er van zowat niks op de pabo egaone naor een structureel project Drents en Duits in het onderwies

– is er nei onderwiesmateriaal as: Echt waor ? Echt waor! en aandern

– bint er neie, eigentiedse kienderliedties in verschillende projecten

– bint er umdebij 45.000 promotieboekies uutegeven

– trekt Taal an Taofel ieder jaor umdebij 800 bezukers

– organiseert de Taolschulte en Keurnoten in heur gemiente veule activiteiten

En waorumme is (dit) oens waark belangriek?

Allereerst is het zo dat de taol onderdiel is van oens culturele riekdom in Drenthe. Het heurt ook bij het 'Hier kom ik weg'-gevuul. Taol verbiendt meinsen, het gef een gevuul van saamhorigheid en eigenheid. Het goeie neis daorbij is, dat onderzuuk van de previncie uutwezen hef dat veul meinsen in Drenthe het (behold van het) Drents belangriek viendt. Streektaol stiet ook landelijk veul in de belangstelling . In positieve zin, want nut en noodzaak wordt al meer eziene.

Ans Klok, Taolschulte in Westerveld

Ans Klok schrijft regelmatig een column voor De Westervelder.